Binguang Tagie Cadiek Bajua

Dimusim samusim nangko, dimaso tahun bak kini, ulah dek sorak rang manggaleh, lamak rayuan tukang gaduah, cabualah balai dibueknyo. Modernisasi kato rang kini, gengsi kalau indak dituruikkan, takuik dianggap katinggalan jaman.

Sado nan lamo manjadi kuno, malu kalau dipakai juo. Padohal kalau dihinok aniengkan,kalau dipikie dalam-dalam nan dikatokan kamajuan dek urang kini, sabananyo adolah satu kamunduran. Makin modern urang kini, makin jauah dari sipaik manusiawi, makin dakek kapado sipaik hewaniah.

Kalau dibilang diuraikan, dietong sandi nan lah tingga, panjanglah kato kadisabuik, elok dikumpa nak nyo singkek, diambiek sajo duo buah contoh barikuik:

Partamo: Dimaso zaman dahulu, kutiko kabudayaan awak masih tinggi, alun masuak pangaruah asiang, kalau ado bagian badan nan masih tagolong aurat padusi bapatampak-an ditangah jalan, bapatontonkan kaurang banyak, tandonyo “urang indak sandereh”.

Mungkin urang tu alah sintieng batuka aka, atau urang misikin, nan bajunyo alah cabiek-cabiek, indak ado pitih pambali baju nan bisa manutuik aurat. Kalau kiniko iyolah tabaliek bana dunia, makin banyak aurat nan indak tasaok, makin santiang, makin tagie mamakainyo dan samakin tagie urang mancaliak. Baju disangajo senteng kateh dan sarawa senteng kabawah, nan ditangah bapadia se. Ado pulo sarawa baru sangajo dilubangi satantang lutuik, laki-laki padusi samo sajo.

Pado hal sado alah-e urang tahu bahaso makin banyak badan nan tak batutuik, makin dakek awak ka binatang.

Nan kaduo: Panghinaan nan paliang mamalukan dan paliang marandahkan dijaman saisuak adolah “disonggengi padusi”. Kalau kiniko makin banyak padusi nan manyonggengi urang dan makin banyak urang nan suko disonggengi padusi. Tuo mudo tagie bana mancaliek acara itu ditelevisi.

Jadi lai batambah maju awak namonyo atau malah batambah mundua dibandiang jo jaman dulu. Tapek kalau dikatokan urang kini “binguang tagie, cadiek bajua”. Tobaiklah lai, salagi angok masih ado !!!

Ditulis oleh Dr. H. Darwis SN Sutan Sati